Kosova vazhdon të ketë lidhje emocionale, politike dhe ekonomike me vendin që 20 vjet më parë bëri një ndërhyrje perëndimore në luftën e saj me Republikën Federale të Jugosllavisë, duke çuar përfundimisht në shpalljen e pavarësisë së Kosovës. Kështu nis foto-reportazhi kushtuar Kosovës publikuar nga prestigjiozja "The Guardian", dokumentuar nga foto-reporteri Cezar Dezfulin. Përmes disa fotografive prestigjiozja britanike ka përmendur sheshet, rrugët dhe emrat që kanë vendosur kosovarët për nder të Amerikës.“Në vitet ’90 presidenti i parë i Kosovës, Ibrahim Rugova, përfundonte konferencat e të premteve me fjalët: ‘Zoti e bekoftë Amerikën dhe miqtë tanë perëndimor’. Kjo frazë u ngulit në mendjen e shqiptarëve dhe u bë edhe më e fuqishme kur Bill Clintoni urdhëroi NATO-n që të bombardonte caqet serbe gjatë luftës në Kosovë në vitin 1999”, shkruan “The Guardian”. “Sot është e vështirë të gjesh gjurmë të luftës dhe se një gjeneratë tashmë është rritur në ambient paqe dhe stabilitet. Por emocioni pro-amerikan është ende prezent”, shkruan gazeta britanike.

Njëra prej rrugëve kryesore të Prishtinës quhet Bulevardi Bill Klinton, për presidentin amerikan. Një tjetër rrugë, shkollë dhe qendër sportive mbajnë emrin e ish-sekretares së Shtetit, Madeleine Albright. Rrugëve mbajnë emrat e kongresmenit amerikan Eliot Engel, ish-presidentit Xhorxh Bush dhe udhëheqësve të vendeve anëtare të NATO-s përfshirë Tony Blair të Britanisë së Madhe, për të cilët Kosova ka një dashuri të veçantë. Më tej "The Guardian" rendit festimet për Amerikën.

“Deri në momentin ketë që nuk do të ketë ndryshime të mëdha të politikës amerikane për Kosovën, nuk ka asnjë arsye për të besuar se do të shuhet besnikëria e këtij territori për Amerikën. Flamujt do të vazhdojnë valëviten në Prishtinë çdo 4 korrik”, shkruan “The Guardian”.

Foto-reportazhi kujton edhe faktin se trupat amerikane kanë qenë të pranishme në Kosovë që nga viti 1999 si pjesë e një misioni paqeruajtës të NATO-s. Sot ka 600-700 ushtarë amerikanë të NATO-s në tokën kosovare. Më tej tregohet edhe një detaj tjetër. “Në tërë Kosovën ka shumë shtëpi private, restorante, hotele dhe ndërtesa publike të ndërtuara si imitime të Shtëpisë së Bardhë”-shkruan prestigjiozja britanike.