Pas një takimi të jashtëzakonshëm në Singapor, Donald Trump dhe Kim Jong-un nënshkruan një marrëveshje që premton se ata do të punojnë së bashku për paqen dhe prosperitetin. Trump tha se do të ndalojë ‘lojërat e luftës’ të SHBA-ve ndaj Koresë së Jugut dhe shtoi se është gati të heqë sanksionet në veri sapo të bindet se kishte filluar një proces i pakthyeshëm i denuklearizimit. Trump tha se palët kishin diskutuar shumë shkurtimisht situatën e të drejtave të njeriut dhe se ai ishte i bindur se Kim do të "bënte gjënë e duhur" për popullin e tij. Marrëveshja përfshinte gjithashtu një premtim për kthimin e eshtrave të ushtarëve të vrarë ose të kapur gjatë luftës së Koresë.

A ishte takimi një triumf për Trump?
Donald Trump dhe Kim Jong-un sapo kishin lënë shtrëngimet e tyre të duarëve kur mbështetësit e presidentit të SHBA-ve u futën në Twitter për të përshëndetur arritjen e tij. Shumë prej tyre, ata skeptikë ishin të prirur për të sulmuar duke hedhur dyshime nëse takimi do të ndodhte ndonjëherë dhe krahasuan Trump me arritjet e Obamës. Trump, i cili pati një takim 41-minutësh me Kim, u bë presidenti i parë i SHBA që u takua me një udhëheqës të Koresë së Veriut. Ndërkohë, kundërshtarët e presidentit amerikan pyetën se ku ishte ndryshimi midis takimit të tij me Kim dhe atij të Obamës me udhëheqësin kuban Raul Castro.
Fjalë boshe?
Marrëveshja e nënshkruar nga Trump dhe Kim nuk ka shumë ndryshim nga përmbajtja e marrëveshjeve të mëparshme. Premtimi kryesor për të shkuar drejt denuklearizimit të gadishullit Korean është shprehimisht një riafirmim i marrëveshjes së nënshkruar midis Koresë së Veriut dhe Koresë së Jugut në prill dhe nuk përfshin kërkesat e gjata amerikane që procesi të jetë i verifikueshëm dhe i pakthyeshëm. Gjuha e përdorur gjithashtu duket më e dobët se ajo e një marrëveshjeje të nënshkruar midis Koresë së Veriut dhe një grupi kombesh udhëheqëse në vitin 2005, që më pas u prish. Në të vërtetë arritja ndoshta më e rëndësishme në dokument ishte një premtim amerikan për të ofruar garanci të sigurisë për PyongYang. Në një konferencë për shtyp, Trump këmbënguli se ai kishte diskutuar çështjen e verifikimit me Kim dhe të dy palët kishin rënë dakord që një kombinim i amerikanëve dhe shtetasve të tjerë do të ishte në gjendje të dëshmonte çarmatimin. Ai shpjegoi se garancitë e sigurisë do të përfshinin një fund të "provokimeve" të lojërave të luftës midis SHBA-ve dhe Koresë së Jugut.
Kujtesë e shkurtër
Sa shpejt gjërat ndryshojnë në sferën diplomatike të Donald Trump! Ndërsa "bromance" e tij me presidentin francez Emmanuel Macron mund të jetë në rënie pas shpërthimit të tij të G7, marrëdhënia e tij me Kimin është dukshëm në kurbën më të lartë. Është e lehtë të harrosh se kjo marrëdhënie ishte nëntë muaj më parë kur të dy ishin duke i drejtuar njeri-tjetrit fyerje personale dhe duke kërcënuar me luftë. Trump, në fjalimin e tij të parë në Asamblenë e Përgjithshme të Kombeve të Bashkuara, e quajti Kimin një "njeri me raketa" që kishte nisur "një mision vetëvrasës për veten dhe regjimin e tij". Në përgjigje, Kim tha se Trump ishte një "qen i frikësuar" dhe një "gangster që donte të luante me zjarrin". Por sot Trump tha për Kim se "ai është një negociator i denjë”. “Ai po negocion në emër të popullit të tij, një negociator shumë i denjë dhe shumë i zgjuar, kaluam një ditë ku mësuam shumë për njëri-tjetrin dhe për vendet tona"-u shpreh Trump. Më vonë gjatë një konference për shtyp ai tha se e respekton Kim për faktin se ai drejtoi vendin e tij në një moshë aq të re, por nuk e përshkroi atë si "të mirë".
Njeriu i harruar?
Ka pasur një kohë të çuditshme në marrëdhëniet SHBA-Korenë e Veriut kur u duk sikur ish ylli i basketbollit Dennis Rodman ishte “ambasadori de facto” i amerikanëve në Phenian. Por me fjalët e ngrohta që vijnë nga Trump dhe Kim, Rodman tani duket de do të jetë më pak i dobishëm. Megjithatë, kjo nuk e ndaloi Rodmanin që të kthehej në Singapor për të mbështetur Samitin Trump-Kim dhe për të dhënë një intervistë emocionale për CNN. Zëdhënësja e Shtëpisë së Bardhë Sarah Huckerbee Sanders falënderoi agjentin Rodman për rolin e tij.
Gjuha e trupit të liderëve
Trump ka një histori të shtrëngimeve agresive të duarve dhe ekspertët e gjuhës së trupit po vëzhgonin me interes se si do të dilte kontakti i parë me Kim. Ata thanë se shtrëngimi i duarve të liderëve zgjati 13 sekonda dhe Trump kërkoi të mbizotërojë Kimin duke i vënë dorën në shpatull liderit të Koresë së Veriut.
Për të mos humbur betejën, Kim e shtyu fuqishëm dorën e Trump, duke e parë atë drejt në sy gjatë gjithë kohës, para se të dilte për t'u përballur me mediet. "Nuk ishte një shtrëngim duarsh", tha Allan Pease, një ekspert i gjuhës australiane dhe autor i disa librave duke përfshirë "Udhëzuesin Definitiv të Gjuhës së Trupit". "Ishte një lëvizje lart e poshtë, secili prej tyre po e tërhiqte tjetrin më afër. Secili nuk po lejonte tjetrin të merrte një shtrëngim dominues", tha ai për Reuters me telefon nga Melburn.
Burimi: Euronews