Ryan Giggs pas ndeshjes së djeshme në deklaratat e ti u shfaq mjaft i zhgënjyer për humbjen ndaj kombëtares shqiptare. Tekniku dëshironte që ta mbyllte 2018 me një fitore, pas një paraqitje të dobët në “Ligën e Kombeve”, por ka mjaftuar goli i Bekim Balajt për të vulosur gjithçka në “Elbasan Arena”.

Uellsiani në deklaratën e tij është shprehur se: “Ne e kontrolluam pjesën e parë dhe menduam se do të ishte e lehtë. Duhej ta kishim fituar këtë miqësore, sepse kishim kontrollin e plotë, .... iu thashë lojtarëve të ishin më konkretë në pjesën e dytë. Në fakt ndodhi e kundërta, lojtarët e mi nuk kishin përqendrim në gjysmën e dytë të ndeshjes."– tha ai.

Në pjesën e dytë në fushë u hodh gjithashtu “ylli” i Real Madrid Gareth Bale, për t’i dhënë një tjetër rrjedhë kësaj ndeshjeje.

“Rezultat shumë zhgënjyes sonte! Por, një falënderim i madh për të gjithë ata që udhëtuan”, – shkruan Bale në “Twitter”, duke pasur parasysh tifozët uellsianë, që kishin bërë kilometra të tëra për këtë miqësore dhe gati ishin më të shumtë në numër se vendësit.