INTV NEWS SHOWBIZ MAGAZINA MUSIC MOVIES FASHION MED+ SPORTS VIDEOS
Pashkët ortodokse, urimi i Metës: Me harmoni, bashkëpunim tejkalojmë çdo sfidë

Pashkët ortodokse, urimi i Metës: Me harmoni, bashkëpunim tejkalojmë çdo sfidë

Publikuar më: 16:49 27-04-2019

Presidenti Ilir Meta ka uruar të gjithë besimtarët ortodoksë me rastin e Pashkëve.

Në një postim në “Facebook”, Meta shprehet se pavarësisht veseve të këqija e mira dhe shpresa nuk vdesin kurrë.

Presidenti thekson se me besimin në Zot dhe duke përqafuar gjithmonë vlerat e mira hyjnore shoqëria mund të tejkalojë çdo sfidë.

“Në vigjilje të kremtimit të Ditës së Ringjalljes së Krishtit, u uroj nga zemra besimtarëve ortodoksë dhe mbarë popullit shqiptar: Nga mot gëzuar Pashkët! Mbarësi, shëndet, paqe e begati në familjet tuaja! Festa e Pashkëve dhe e dritës që nuk perëndon kurrë, na kujton sot se para malit të së keqes, padrejtësive, veseve, frikës e zhgënjimit, mosbesimit e arrogancës, korrupsionit, dhunës dhe çdo fenomeni negativ që vret paqen, drejtësinë e barazinë sociale dhe helmon rëndë shoqërinë, shpresa dhe e mira nuk vdesin kurrë.

Me besimin në Zot dhe duke përqafuar gjithmonë vlerat më të mira hyjnore, morale e sociale, por edhe kombëtare, me dashuri, harmoni të plotë, dialog, mirëkuptim, bashkëpunim e vëllazërim, secili prej nesh dhe shoqëria jonë në tërësi, mund të tejkalojë çdo sfidë, pavarësisht sakrificave, për të ecur e sigurt drejt së ardhmes më të mirë, në familjen europiane.

Të dashur miq, Dita e Ringjalljes së Krishtit gjithashtu na kujton nevojën për të forcuar jo vetëm harmoninë tonë të shkëlqyer ndërfetare, por edhe solidaritetin me njerëzit në nevojë, të sëmurët, të pamundurit, fëmijët e të moshuarit, që kanë aq shumë nevojë për përkujdesje e dashuri të përhershme. Duke u përcjellë të gjithëve urimet e mia më të mira në prag të kësaj Dite të Shenjtë, jam i bindur se shpresat te jeta më e mirë do të ringjallen për mbarë shqiptarët! GËZUAR PASHKËT!”

Article Logic
Execution time: 0.0029399394989014