Qeveria hungareze po mendon një ligj të ri ku do të cilësohen kriminelë të gjithë ata që ndihmojnë emigrantë të paligjshëm që kërkojnë azil.

Legjislacioni parashikon printimin e manualeve me informacione për azilkërkuesit dhe dhënia e ushqimeve për ta, apo e këshillave ligjore, do të konsiderohen një shkelje penale.

Dënime me burg variojnë nga disa ditë e deri në një vit.

Kryeministri nacionalist, Viktor Orban po sfidon në këtë mënyrë politikat e BE-së për emigracionin.

Hungaria, Polonia, Republika Çeke dhe Sllovakia kundërshtojnë një skemë të BE-së për zhvendosjen e 160 mijë refugjatëve nga Siria dhe Eritrea në vende të tjera të unionit, për të zbutur peshën e Italisë dhe Greqisë, ku kampet e emigrantëve janë të mbipopulluara.

Parlamenti hungarez po debaton projektligjin e ri, pavarësisht faktit se shumë pak emigrantë apo refugjatë janë përpjekur të hyjnë në Hungari, kjo edhe për shkak të rrethimit me tela me gjemba të kufirit jugor të vendit.