Çifti që zgjodhi të protestonte duke hipur në maj të vinçit mbrëmjen e së shtunës zbriti paraditen e sotme pas 15 orësh qëndrimi në lartësi. Ferdinand dhe Teuta Saraçi, të cilët kaluan natën mbi skeletin e një vinçi pranë ish-kompleksit “Dinamo”, në Tiranë u bindën duke u ulur në tokë rreth orës 11:00. Ata pranuan të heqin dorë nga akti i tyre ekstrem pas negociatave me policinë dhe pasi drejtuesit e dy institucione shtetërore pranuan të takojnë çiftin për të zgjidhur problemin e tyre të pronësisë . Ata pretendojnë se u është tjetërsuar pronësia e banesës, duke i nxjerrë nga shtëpia. Por çifti nuk është i panjohur për policinë, pasi edhe më herët kanë kërcënuar të kryejnë veprime ekstreme. Skamja, mungesa e drejtësisë për pronësinë e shtëpisë, i ka detyruar ata të kërcënojnë për të dytën herë me hedhje nga vinçi.