Pas tre alarmeve false për përurimin e tij, këtë javë Turqia do të hapë plotësisht aeroportin e ri gjigand në Stamboll.

Transferimi nga Aeroporti Ndërkombëtar Ataturk, në aeroportin e ri të Stambollit, i cili kap vlerën e 8 miliardë dollarëve, ka nisur në orët e para të mëngjesit të sotëm.

Ministria e Transportit ka thënë se ky proces pritet të kompletohet më 7 prill. Trafiku ajror do të ndalet në të dyja aeroportet për 12 orë, duke nisur më 6 prill, derisa pritet që edhe disa autostrada të mbyllen gjatë kësaj kohe.

Kompanitë ndërkombëtare pritet të rinisin fluturimet nga objekti i ri në mesnatën e 6 prillit.

Ky aeroport planifikohet t’iu shërbejë rreth 200 milionë pasagjerëve brenda një viti deri më 2027.