Pas ndarjes tragjike nga jeta të këngëtarit të njohur Shpat Kasapi, bashkëshortja e tij, Selvije Jao, ka ndarë një mesazh prekës në rrjetet sociale. Ajo kujton momentet e fundit para se Shpati të planifikonte hyrjen në Big Brother VIP, ku ai e pyeti nëse do të mund të përballonte mungesën e tij dhe të kujdesej e vetme për djalin e tyre, Roelin.

“Patjetër… do të të kem 24/7 para syve,” ishte përgjigjja e saj, dhënë me humor, pa e menduar kurrë se jeta do ta sfidonte në mënyrë kaq të dhimbshme.

Selvije shprehu dhimbjen e thellë për humbjen e bashkëshortit, duke treguar se ende e pret sikur hyrja e tij në Big Brother të jetë thjesht një vonesë. Ajo rrëfen se zemra i plas nga mungesa e tij, ndërsa Roeli po rritet pa dorën e babait.

“Unë mësoj çdo ditë të jetoj me një dhimbje që nuk mësohet kurrë të shuhet,” shkruan ajo, duke përfunduar me fjalët: “Më mungon, Shpat. Më mungon më shumë se sa fjalët mund ta mbajnë.”

Top Channel ka bërë homazhe për artistin, duke nderuar kujtimin e tij në një transmetim të veçantë.