Këngëtarja e njohur Violetë Kukaj ka dërguar një reagim zyrtar drejt produksionit të Big Brother VIP Albania, duke kërkuar masa të menjëhershme ndaj banorit Rogert Sterkaj.

Shkak për reagimin e saj është bërë gjuha e përdorur nga Sterkaj ndaj djalit të saj, Malit, i cili u sulmua me deklarata që prekin identitetin dhe origjinën e tij.

Në letrën e hapur drejtuar Top Channel, Violetë Kukaj shpreh shqetësimin për bullizmin dhe dhunën psikologjike që po i ushtrohet Malit. Ajo thekson se sulmet që prekin familjen, traumat personale dhe identitetin nuk mund të konsiderohen pjesë e lojës, por përbëjnë dhunë psikologjike të pastër që cenon integritetin e fëmijës dhe normat shoqërore.

Debati nisi pas një përplasjeje brenda shtëpisë, ku Rogert i drejtoi Malit fjalët: “Nuk ke gjak shqiptari”. Familjarët dhe fansat e kanë cilësuar deklaratën si një fyerje të rëndë personale dhe kombëtare, duke e bërë situatën të papranueshme për rregullat dhe etikën e programit.

Në reagimin e saj, familja e Malit i kërkon produksionit të marrë masa urgjente, duke kërkuar zyrtarisht përjashtimin e Rogert Sterkaj nga gara. Ata argumentojnë se heshtja ndaj veprimeve të tilla do të normalizonte dhunën dhe bullizmin në ekranet televizive, duke dërguar një mesazh negativ tek publiku.