Basha nxjerr ligjet: ‘’Ushtria në aeroport antikushtetuese, akti i fundit i qeverisë ilegjitime’’

Publikuar më: 21:09 10-04-2019

Kreu i PD-së Lulzim Basha ka komentuar vendimin e Ministrisë së Mbrojtjes për të marrë nën kontroll aeroportin e Rinasit. Pak pasi u shpreh se vendimi është antikushtetues, kryedemokrati publikon edhe ligjet përkatëse.

Në postimin e tij të “Facebook”, Basha ndër të tjera thekson se ky vendim tregon rënien e shtetit.

“Rënia e shtetit dhe akti i fundit antikushtetues i qeverisë ilegjitime, në gërmat e Kushtetutës së Shqipërisë dhe Ligjit për Forcat e Armatosura:

Kushtetuta e Republikës së Shqipërisë

Neni 173

1. Në rast rreziku për rendin kushtetues dhe për sigurinë publike, Kuvendi, me kërkesë të Këshillit të Ministrave, mund të vendosë në një pjesë ose në të gjithë territorin e shtetit gjendjen e jashtëzakonshme, e cila zgjat për aq kohë sa vazhdon rreziku, por jo më shumë se 60 ditë.
2. Me vendosjen e gjendjes së jashtëzakonshme ndërhyrja e forcave të armatosura bëhet me vendim të Kuvendit dhe vetëm kur forcat e policisë nuk janë në gjendje të rivendosin rendin.
3. Zgjatja e afatit të gjendjes së jashtëzakonshme mund të bëhet vetëm me pëlqim të Kuvendit çdo 30 ditë, për një periudhë jo më shumë se 90 ditë!!

LIGJI I PUSHTETEVE TE DREJTIMIT TE FORCAVE TE ARMATOSURA

Neni 22

Përdorimi i Forcave të Armatosura gjatë gjendjes së jashtëzakonshme
1. Gjendja e jashtëzakonshme vendoset me ligj nga Kuvendi, sipas dispozitave të Kushtetutës së Republikës së Shqipërisë.
2. Me vendosjen e gjendjes së jashtëzakonshme, Forcat e Armatosura, me vendim të Kuvendit, pas kërkesës së Këshillit të Ministrave, mund të ndërhyjnë për rivendosjen e rendit, vetëm kur forcat e policisë nuk janë në gjendje ta kryejnë këtë detyrë.
3. Gjatë gjendjes së jashtëzakonshme Kryeministri është drejtpërdrejt përgjegjës për drejtimin e Forcave të Armatosura, përmes hierarkisë së drejtimit e të komandimit.
4. Pas përfundimit të gjendjes së jashtëzakonshme Kryeministri i raporton Kuvendit për përdorimin e Forcave të Armatosura gjatë kësaj periudhe.
5. Veprimet, që ndërmerren nga Forcat e Armatosura gjatë gjendjes së jashtëzakonshme, duhet të jenë në përpjesëtim me shkallën e rrezikut dhe duhet të synojnë rivendosjen sa më të shpejtë të funksionimit normal të shtetit.”-shkruan Basha.