INTV NEWS SHOWBIZ MAGAZINA MUSIC MOVIES FASHION MED+ SPORTS VIDEOS
Veliaj vizitë në Mynih: Krenar për vlerësimin e Tiranës si qytet model

Veliaj vizitë në Mynih: Krenar për vlerësimin e Tiranës si qytet model

Publikuar më: 14:59 10-03-2018

Tirana përzgjidhet si qyteti model i zhvillimit në Forumin vjetor të arkitektëve dhe urbanistëve gjermanë, organizuar nga Ministria e Zhvillimit Urban të Bavarisë dhe qyteti i Mynihut. Në këtë aktivitet ishte i pranishem edhe kryetari i Bashkisë së Tiranës, Erion Veliaj. I ftuar në Forumin vjetor për Qytetet dhe Ardhmërinë, krybashkiaku prezantoi transformimin që ka pësuar Tirana dhe projektet strategjike për të ardhmen. Në fjalën e tij, kryebashkiaku Veliaj theksoi se një pjesë e madhe e suksesit ka ardhur falë qytetarëve të Tiranës, të cilët kanë nxitur një sërë nismash të rëndësishme për qytetin. “Jam shumë krenar për Tiranën! Jemi përzgjedhur si një qytet model, kësaj here në forumin vjetor të arkitekturës gjermane organizuar nga Ministria e Zhvillimit Urban të Bavarisë dhe nga qyteti i Mynihut. Jam shumë krenar sepse jo vetëm Bashkia ka bërë punën që duhet të bëjë, por një pjesë e madhe e sukseseve tona i kushtohet qytetarëve të Tiranës. Janë ata që kanë inkurajuar ditët pa makina, që po kthejnë zonat pedonale, që po mbjellin pemë, që po e mbajnë pastër qytetin. Historia e vërtetë e suksesit të Tiranës është se çdo qytetar e ndjen që është pjesë e familjes së Tiranës dhe kujdeset për mbarëvajtjen e punëve”, tha Veliaj. Kreu i Tiranës deklaroi gjatë fjalës së tij se nuk ka një qytet të dytë sot në Europë, ku qytetarët janë kaq shumë të përfshirë me pastrimin, mbjelljen e pemëve, kujdesin e hapësirave publike, korsitë e biçikletave dhe mënyrën se si po krijohet një sens përkatësie për përkujdesje ndaj qytetit. Veliaj tha se Tirana ka bërë në një kohë të shkurtër një kapërcim gjigant, si dhe siguroi se edhe këtë vit Bashkia ka planifikuar një sërë investimesh të rëndësishme, si ndërtimi i shkollave të reja, transformimi i Piramidës dhe i mjaft zonave të reja të qytetit, të cilat gjatë këtyre viteve kanë njohur zhvillim, por jo urbanizim. “Edhe këtë vit do të vazhdojmë të nxisim shumë prej projekteve që tashmë i kemi nisur, siç janë shkollat e reja, Piramida, ndërtesa të tjera me funksion publik, më shumë fokus në zonat e reja të Tiranës, si zona e Kasharit, zona e Unazës së Re, zona e Freskut pranë Dajtit, apo zona e Selitës. Kthehemi të inkurajuar nga fakti se Tirana po merr vlerësime, që në një kohë të shkurtër ka bërë një kapërcim gjigand, për të vazhduar projektet që kemi nisur”, deklaroi ai. Duke falenderuar qytetarët për mbështetjen që kanë dhënë gjatë këtyre 3 viteve në zbatimin e një sërë projektesh të rëndësishme, si fushata për mbjelljen e 100 mijë pemëve të reja deri më 21 mars, Veliaj u shpreh se Tirana do të vendosë një standard për të realizuar synimin e krijimit të Pyllit Orbital me 2 milionë pemë.

Article Logic
Execution time: 0.0039799213409424