Një nga ngjarjet më të veçanta astronomike të vitit do të ndodhë më 12 gusht, kur një eklips total i Diellit do të krijojë për pak minuta një nga pamjet më spektakolare të qiellit.

Mijëra njerëz kanë planifikuar udhëtime drejt vendeve përgjatë brezit të eklipsit, mes tyre Spanja, Islanda dhe Grenlanda, për të parë momentin kur Hëna do të mbulojë plotësisht Diellin.

Në Shqipëri, spektakli do të jetë më i kufizuar. Nga Tirana eklipsi do të shihet vetëm pjesërisht, me Hënën që do të mbulojë rreth 19% të diskut të Diellit.

Fenomeni në kryeqytet pritet të nisë rreth orës 19:31, ndërsa kulmi do të arrihet në 19:41. Eklipsi do të përfundojë rreth 19:44, pak para perëndimit të Diellit. Për këtë arsye, nga Shqipëria nuk do të mund të shihet errësimi i plotë i Diellit dhe as fenomenet që shfaqen vetëm në zonën e eklipsit total.

Një prej pamjeve më të rralla gjatë një eklipsi total është “Efekti i Unazës me Diamant”. Pak sekonda para ose pas momentit të mbulimit të plotë, një rreze e vetme drite kalon mes relievit të Hënës, ndërsa drita e atmosferës së jashtme të Diellit krijon një unazë të ndritshme. Rezultati ngjan me një diamant të vendosur mbi një unazë.

Po në ato çaste mund të shfaqen edhe “Rruazat e Baily-t”, pika të vogla drite që krijohen kur rrezet e Diellit kalojnë përmes maleve dhe luginave në sipërfaqen e Hënës. Edhe ky fenomen zgjat vetëm disa sekonda.

Momenti më i veçantë mbetet shfaqja e koronës diellore. Kur Hëna mbulon plotësisht Diellin, drita e fortë e tij nuk e pengon më pamjen dhe atmosfera e jashtme e yllit bëhet e dukshme si një aureolë e bardhë rreth diskut të errët të Hënës.

Para dhe pas fazës së plotë, me pajisje të përshtatshme vëzhgimi mund të dallohen edhe njollat diellore, zona më të errëta në sipërfaqen e Diellit që lidhen me aktivitetin e tij magnetik.

Brezi i eklipsit total do të përfshijë pjesë të Spanjës, Islandës, Grenlandës, Portugalisë, Rusisë, Kanadasë dhe SHBA-së, si edhe zona të tjera të Evropës, Arktikut dhe Atlantikut të Veriut.

Në qytete si Nju Jorku, Berlini, Londra dhe Tirana, fenomeni do të jetë i dukshëm vetëm pjesërisht. Për shqiptarët, momenti më i rëndësishëm do të jetë rreth orës 19:41, kur Hëna do të mbulojë rreth një të pestën e diskut diellor.

Për vëzhgimin e eklipsit nevojiten syze të certifikuara për eklipse ose pajisje të posaçme me filtra diellorë. Syzet e zakonshme të diellit nuk ofrojnë mbrojtjen e nevojshme për të parë drejtpërdrejt Diellin.