Deputetja e PD, Jorida Tabaku shprehet se Shqipëria është vendosur nën monitorim të rreptë për pastrimin e parave nga një institucion i huaj.

“Moneyval vendos Shqipërinë në monitorim të rreptë për pastrimin e parave! Jo më larg se pak ditë më parë, siç mediat e bënë publike, institucioni më i rëndësishëmnë fushën e luftës ndaj Pastrimit të Parave ka detyruar Këshillin e Europës që të vendosë në monitorim të rreptë institucionet shtetërore dhe vetë Shqipërinë për pastrimin e parave”, tha Tabaku.

Në vijim ajo shprehet se vendi po bën hapa pas. “Laku po ngushtohet për qeveritarët dhe ato që kanë në dorë makinën e propagandës. Fatkeqësisht vendi jonë kthehet disa hapa pas, që ne i kishim kaluar që në vitin 2010. Por, kjo është trajektorja e shëmtuar e një vendi që u kanabizua për katër vjet me radhë, u kthye në një magazinë dhe shpërndarëse droge dhe sot gjendet përpara miliardave të drogës dhe bosëve të drogës që qeverisin. Vlerësimi i Moneyval vjen mbas raportit të DASH që thekson rrezikun në rritje të pastrimit të parave dhe të Institutit të Bazelit për Shqipërinë si vend me rrezik”, shkruan Tabaku.