Selin Bollati ka zhvilluar së fundmi një bashkëbisedim të afërt me ndjekësit e saj në Instagram, duke iu përgjigjur disa prej pyetjeve dhe kurioziteteve të tyre.

Njëra prej pyetjeve ishte e drejtpërdrejtë: “Në Kosovë apo Shqipëri?”

Por përgjigjja e Selin nuk ishte aspak një zgjedhje mes dy vendeve. Përkundrazi, ajo e bëri të qartë se për të, lidhja me të dyja vendet është thellësisht personale.

“Në Kosovë apo Shqipëri, me rëndësi që jam në vendin tim, me njerëzit e mi, gjakun tim!!”, shkroi ajo, duke e shoqëruar mesazhin me flamujt e Shqipërisë dhe Kosovës.

Nuk është sekret se Selin ka një raport shumë të afërt edhe me Kosovën. Sa herë që ndodhet atje, ajo kalon kohë pranë familjes së Gimbos, me të cilën ka ndarë shpesh momente të veçanta edhe në rrjetet sociale, duke dëshmuar marrëdhënien e ngrohtë që ka krijuar me njerëzit e tij më të afërt.

Nga ana tjetër, Selin dhe Gimbo prej kohësh kanë zgjedhur Tiranën për të ndërtuar jetën e tyre të përbashkët, ku edhe bashkëjetojnë.

Kështu, nëse pyetja ishte Kosovë apo Shqipëri, përgjigjja e Selin është shumë më e thjeshtë sesa një zgjedhje mes dy vendeve: atje ku janë njerëzit e saj, aty ndihet në vendin e vet.