Lionel Messi ka reaguar për herë të parë pas humbjes së Argjentinës në finalen e Kupës së Botës 2026 ndaj Spanjës. Me një postim në Instagram, kapiteni argjentinas ndau zhgënjimin për humbjen, por njëkohësisht falënderoi tifozët për mbështetjen dhe përgëzoi kampionët e rinj të botës.

“Dhimbja është shumë e madhe dhe do të duhet kohë që kjo plagë të mbyllet. Por zgjedh të mbaj me vete gjithçka të bukur… Ndeshjet që zhvilluam duke dhënë gjithçka nga vetja dhe që do të mbeten përgjithmonë në kujtesë, mbështetjen e një vendi të tërë që, së bashku me punën dhe përkushtimin e këtij grupi, na riktheu edhe një herë mes më të mirëve në botë. Sot është e vështirë të vlerësojmë atë që arritëm, por ky grup arriti në dy finale radhazi të Kupës së Botës”, shkroi Messi.

Sulmuesi falënderoi të gjithë ata që i kanë qëndruar pranë ekipit pas finales, duke theksuar se kombëtarja arriti të bashkojë edhe një herë të gjithë argjentinasit.

“Faleminderit nga zemra për çdo urim dhe për çdo mesazh. Edhe një herë arritëm të bashkohemi si komb dhe të ndajmë krenarinë e madhe për të qenë argjentinas”, vijoi ai.

Në fund të mesazhit, 39-vjeçari tregoi respekt për kundërshtarët, duke mbyllur postimin me një urim për kampionët e rinj të botës.

“Dua gjithashtu të përgëzoj Spanjën për fitimin e kampionatit”, përfundoi Messi.

Postimi i tij vjen një ditë pas finales së humbur dhe është pritur me mijëra reagime nga tifozët, të cilët kanë vlerësuar mesazhin e tij sportiv dhe respektin e treguar ndaj Spanjës.