Ish-banorja e “Big Brother VIP 5”, Edisa Demollari, ka folur hapur ekskluzivisht për Bordo për eksperiencën e saj në reality show, miqësitë që ruan nga ai format por dhe planet që ka për televizionin.

Në një intervistë ekskluzive për Revistën Bordo, Edisa u shpreh se edhe jashtë kamerave është e njëjta, duke theksuar se nuk është penduar për qëndrimet apo deklaratat e saj gjatë qëndrimit në shtëpi.

E pyetur nëse sinqeriteti i ka kushtuar, ajo tha se mund të ketë pasoja në afat të shkurtër, por sipas saj, njerëzit e sinqertë vlerësohen dhe dallohen me kalimin e kohës.

“Mund të kushtojë në afat të shkurtër, por në afat të gjatë njerëzit e sinqertë vlerësohen dhe diferencohen nga pjesa tjetër”, u shpreh Edisa.

Ish-banorja pranoi se në disa raste mund t’i kishte përzgjedhur fjalët ndryshe, por jo të ndryshonte thelbin e asaj që ka dashur të thotë. Ajo shtoi se, edhe duke e parë tani eksperiencën nga jashtë, nuk do të ndryshonte qasje me asnjë prej banorëve.

Edisa zbuloi gjithashtu se miqësitë që u krijuan natyrshëm brenda shtëpisë vazhdojnë edhe pas përfundimit të formatit.

“Miri, Juela dhe pak Rogerti”, tha ajo, duke shtuar më pas me humor: “Po Rogerti është i zënë kohët e fundit”.

Sa u përket raporteve më të ftohta me disa nga ish-banorët, Edisa sqaroi se nuk i konsideron konflikte, por thjesht mospërputhje karakteresh.

“Është normale që kur nuk të përputhen për aq ditë brenda, nuk do të përputhen as jashtë. Secili vazhdon rrugën e vet i ndarë”, deklaroi ajo.

Duke folur për autenticitetin në një format reality, Edisa theksoi se strategjia e saj e vetme ishte të qëndronte vetvetja. Ajo shtoi se nuk mendon se hyrja në një fazë më të hershme të programit do të kishte ndryshuar diçka në rrugëtimin e saj.

“Hyra në pikën që duhej dhe nuk do të bëja asgjë ndryshe”, përfundoi Edisa.