Cristiano Ronaldo ka reaguar për herë të parë publikisht për situatën e krijuar gjatë grumbullimit të fundit të kombëtares së Portugalisë, duke rrëfyer në detaje versionin e tij për përplasjen me trajnerin Roberto Martínez.

Në një deklaratë të gjatë të publikuar në Instagram, Ronaldo tregon se pas Botërorit 2026 kishte menduar të largohej përfundimisht nga kombëtarja, madje kishte përgatitur edhe një letër drejtuar popullit portugez. Megjithatë, presidenti i Federatës Portugeze të Futbollit e kishte bindur të rishikonte vendimin.

Sipas Ronaldos, ai ishte gjithashtu dakord me zgjedhjen e trajnerit aktual, për të cilin thotë se vetë ishte pyetur nga presidenti i Federatës.

“Kur u njoftua trajneri aktual, isha vërtet i lumtur me zgjedhjen. Ishte opsioni i duhur, siç po tregojnë edhe rezultatet”, shkruan Ronaldo.

Ai tregon se pak ditë më vonë u takua me trajnerin, i cili i prezantoi një plan për menaxhimin e minutave të tij. Sipas këtij plani, Ronaldo do të luante ndeshjen e parë dhe të fundit, ndërsa për arsye fizike do të kishte rotacion në ndeshjet e tjera.

Trajneri i kishte propozuar që Ronaldo të mos udhëtonte me skuadrën në Norvegji dhe Danimarkë, por të qëndronte në Portugali pas ndeshjes së parë dhe të rikthehej për takimin në “Dragão”.

Ronaldo thotë se e refuzoi menjëherë këtë ide.

“Edhe pse nuk do të luaja në ndeshjet jashtë, unë isha ende kapiten i skuadrës. Ky privilegj nuk do të ishte një shembull i mirë”, shprehet ai.

Sipas tij, trajneri pranoi argumentin e tij dhe marrëveshja mbeti e pandryshuar.

Por situata ndryshoi gjatë ndeshjes në Norvegji. Ronaldo tregon se fillimisht nuk ishte parashikuar të luante, por gjatë drekës një prej asistentëve të trajnerit i kërkoi të përgatitej për rreth 30 minuta lojë.

“Pa asnjë problem thashë po. Ishte jashtë planit tim të rikuperimit fizik dhe stërvitjes, sepse do të luaja vetëm më 4 në ‘Dragão’. Por, sigurisht, pranova”, shkruan ai.

Ronaldo u ngroh gjatë pjesës së dytë, por në fund nuk u aktivizua.

“Trajneri nuk e mbajti fjalën”, shkruan kapiteni portugez.

Pas ndeshjes, Ronaldo pranon se nuk shkoi të përshëndeste tifozët, duke kërkuar falje për këtë veprim.

“Është një gabim që më takon vetëm mua dhe nuk duhej të ndodhte. I kërkoj falje popullit portugez, tifozëve dhe të gjithë atyre që, edhe pse nuk janë portugezë, mund të kenë udhëtuar për të më parë dhe mund t’i kem zhgënjyer”, shprehet ai.

Dy ditë më vonë, Ronaldo, trajneri dhe Simão Coutinho zhvilluan një takim ku, sipas tij, u vendos që trajneri të sqaronte publikisht atë që kishte ndodhur.

Ronaldo pretendon se trajneri duhej të pranonte se ishte ai që kishte propozuar planin për përdorimin e tij, se Ronaldo nuk kishte kërkuar të luante dhe se ishte gabim që e kishte nxehur dhe më pas nuk e kishte aktivizuar.

Megjithatë, sipas Ronaldos, konferenca për shtyp nuk shkoi sipas marrëveshjes.

“Qëndrimi i tij nuk kishte asnjë lidhje me takimin tonë. Dëgjova shprehje dhe një agresivitet që besoj se nuk i meritoja. Një qëndrim ‘kryelartë’ që ai nuk ma kishte treguar kurrë, as nga larg, privatisht një ditë më parë”, shkruan Ronaldo.

Ai publikoi edhe shënimet që, sipas tij, ishin dakordësuar për t’u thënë në konferencën për shtyp. Në to trajneri duhej të deklaronte se Ronaldo nuk kishte vënë kurrë në dyshim vendimet e tij, se kishte qenë “shembullor, besnik dhe profesionist” dhe se gabimi ishte i trajnerit që e kishte nxehur pa e futur në lojë.

“Kam bërë një gabim duke bërë që dikush me përmasat e Pelé ose Maradonës të ngrohej dhe më pas të mos futej në lojë. Nëse do të ndodhte sot, nuk do ta bëja”, thuhej në deklaratën që Ronaldo pretendon se ishte rënë dakord.

Pas kësaj, Ronaldo vendosi të largohej nga grumbullimi.

“Për mua, e vërteta është ende gjëja më e rëndësishme në marrëdhëniet mes njerëzve. Pavarësisht se sa mund të dhembë, më thuaj të vërtetën”, shkruan ai.

Ronaldo thekson se përpara konferencës kishte folur edhe me presidentin e Federatës dhe trajnerin dhe u kishte kërkuar që t’i thonin hapur nëse nuk e donin më në kombëtare.

“Gjithçka që duhej të bënin ishte të ishin të sinqertë me mua. Unë do ta pranoja dhe do të premtoja se do të përgatisnim diçka të bukur. Ata u përgjigjën njëzëri se jo, se vendi im ishte me kombëtaren”, tregon ai.

Pavarësisht situatës, Ronaldo pranon se nuk duhej të largohej nga grumbullimi dhe u kërkon falje edhe shokëve të skuadrës.

“Duhet t’u kërkoj falje shokëve të mi të kombëtares që u largova nga grumbullimi. Pavarësisht shkeljes absolute të besimit te fjala e trajnerit, nuk duhej ta kisha bërë. Përgjegjësia është tërësisht e imja”, shkruan ai.

Ai gjithashtu thotë se pret që Federata Portugeze ta ndëshkojë për veprimin e tij.

“Besoj se dënimi nuk duhet të ketë faktorë lehtësues. Nuk jam thjesht një lojtar. Jam kapiten i ekipit dhe kjo është një rrethanë rënduese”, shprehet Ronaldo.

Në fund, 41-vjeçari prek edhe mundësinë e një lamtumire nga kombëtarja. Ai thotë se do të ketë një ose më shumë ndeshje lamtumire, por thekson se prioriteti i tij mbetet konkurrimi dhe fitimi me Portugalinë.

“Nëse jam fizikisht mirë, luaj për klubin tim, shpresoj me gola, dhe pasi të kem vuajtur çdo pezullim që më vendoset, do të jem i gatshëm, siç kam qenë gjithmonë deri më sot, të konkurroj dhe të fitoj për kombëtaren tonë.”

“Ky është, më besoni, versioni më i pastër i së vërtetës”, e mbyll Ronaldo deklaratën e tij.