Shtëpia e Big Brother VIP Kosova 5 ka hapur dyert për konkurrentët e parë, duke sjellë një grup personazhesh me profesione, karaktere dhe histori të ndryshme. Gjatë mbrëmjes së parë, gjashtë emra kanë zyrtarizuar pjesëmarrjen në këtë edicion, duke u bërë pjesë e një aventure që pritet të sjellë emocione, përplasje dhe surpriza.

E para që hyri në shtëpi ishte Arlinda Morina, regjisore dhe aktiviste. Gjatë prezantimit, ajo paralajmëroi se mund të mos jetë menjëherë personazhi më i lehtë për t’u përballuar nga të tjerët, por është e bindur se me kalimin e kohës do të fitojë simpatinë e tyre.

Rrugëtimin e nisën gjithashtu Antoneta Koçi, gazetare dhe moderatore, e cila u shpreh se dinamika e këtij formati përputhet me natyrën e saj. Ajo la të kuptohet se nuk do të qëndrojë në heshtje kur të ketë diçka për të thënë. Një tjetër emër që iu bashkua garës është Nichi. 23-vjeçari, i lindur në Amerikë dhe i rritur në Prishtinë, tha se dëshiron që përmes kësaj eksperience publiku të njohë edhe anë të tij që deri më tani kanë mbetur larg vëmendjes.

Mes banorëve të parë është edhe këngëtari Bejta, ndërsa në shtëpi hyri gjithashtu moderatorja Anjeza Gubetini. Kjo e fundit tregoi se e ka parë pjesëmarrjen në BBVK si një mundësi për të përjetuar diçka ndryshe, për t’u argëtuar dhe për ta shijuar çdo moment të aventurës. Listës së konkurrentëve iu shtua edhe Fatlum Dreshaj, boksier profesionist që jeton në Gjermani. Për të, kjo eksperiencë përfaqëson një sfidë të re, larg ringut dhe rregullave të sportit që e ka shoqëruar deri më tani.

Gjashtë banorët e parë tashmë kanë nisur lojën, por ky është vetëm fillimi. Mbetet për t’u parë se si do të përshtaten me njëri-tjetrin dhe cilët prej tyre do të spikasin në ditët e para të këtij edicioni.