Pritjes për edicionin e pestë të “Big Brother VIP Kosova” po i vjen fundi, ndërsa sinjalet e fundit nga njerëzit e përfshirë në produksion tregojnë se spektakli po përgatitet për rikthimin në ekran.

Moderatori Alaudin Hamiti dhe producentja Olsa Muhameti kanë ndarë më herët detaje që lidhen me përgatitjet e sezonit të ri, duke shtuar kureshtjen për datën e premierës dhe personazhet që do të bëhen pjesë e shtëpisë së famshme.

Olsa Muhameti kishte treguar se synimi ishte që BBVK 5 të niste gjatë muajit tetor, më herët se edicioni i kaluar, i cili filloi në fund të nëntorit. “Nuk e kam një datë, por besoj më shpejt se vitin e shkuar, më herët. Vitin e kaluar ka shkuar në fund të nëntorit, shpresoj dhe besoj në tetor”, ishte shprehur ajo.

Ndërkohë, Alaudin Hamiti ka bërë të ditur se kanë përfunduar xhirimet e klipeve për sezonin e ri, një zhvillim që tregon se përgatitjet kanë hyrë në një fazë të avancuar. Moderatori kishte ngjallur interes edhe më herët, kur e cilësoi kastin e këtij edicioni si “kastin më të fuqishëm deri më sot”.

Megjithatë, deri më tani, data e saktë e nisjes nuk është konfirmuar zyrtarisht nga produksioni. Edhe emrat e banorëve që do të hyjnë në shtëpi mbeten të pazbuluar, duke e mbajtur të lartë kureshtjen e publikut.

Një ndryshim i konfirmuar për këtë sezon është mungesa e Jonida Vokshit në moderim, pas katër edicionesh, ndërsa Alaudin Hamiti pritet të vijojë drejtimin e spektaklit. Me përfundimin e disa prej përgatitjeve kryesore, vëmendja tashmë është përqendruar te njoftimi zyrtar që do të përcaktojë ditën kur BBVK 5 do të nisë rrugëtimin e tij në ekran.