Presidenti Ilir Meta ka refuzuar Skënder Gjinushin në krye të Akademisë së Shkencave. Pasi ka bërë vlerësimet bazuar në ligjin për Akademinë e Shkencave, Meta vëren se, praktika e ndjekur për zhvillimin e zgjedhjeve për Kryetar të Akademisë së Shkencave nuk është bërë konform ligjit. Ditën kur janë zhvilluar zgjedhjet, Skënder Gjinushi rezulton të ketë qenë ligjërisht Kryetar i Partisë Socialdemokrate. Sipas Metës, nëse një kandidat garon për tu bërë kreu i Akademisë së Shkencave, nuk duhet të ketë poste të rëndësishme politike.

“Sipas këtij informacioni më 24 maj 2019, ditë e realizimit të procesit zgjedhor për Kryetar të Akademisë së Shkencave, zoti Skënder Gjinushi ligjërisht figuron në postin drejtues të Kryetarit të Partisë Social Demokrate. Këtë cilësi, si Kryetar i PSD-së, zoti Skënder Gjinushi, e ka mbajtur edhe në çastin kur ka paraqitur kërkesën nr.89/15 prot., datë 10.05.2019 ku ka shprehur interesimin për të kandiduar për Kryetar të Akademisë së Shkencave. Për më tepër, në çastin e shprehjes së interesit për kandidim në datën 10 maj 2019, zoti Skënder Gjinushi, nuk kishte dhënë as dorëheqjen nga funksioni i Kryetarit të PSD-së, akt ky (dorëheqja) që është formalizuar 5 ditë më vonë, në datën 15.05.2019”, thuhet në argumentet e Presidentit.

Shkelje sipas Presidentit janë bërë që në momentet kur Gjinushi ka qenë anëtari i Akademisë, pasi ligji e ka të përcaktuar qartë se nëse një anëtar i rregullt mban pozicione drejtuese në parti, nuk i lejohet që të kandidojë në funksione drejtuese në Akademinë e Shkencës.

“Papajtueshmëria ligjore në ushtrimin e statusit si anëtar i rregull i Akademisë së Shkencave, e bën tërësisht procesin zgjedhor të pavlefshëm. Kjo, sepse çdo anëtar i rregullt i Akademisë së Shkencave që ka papajtueshmëri të statusit si anëtar i rregullt i saj me funksione drejtuese në parti politike, rrjedhimisht është në kushtet e ndalimit ligjor për të kandiduar dhe për t’u zgjedhur në funksionet drejtuese të Akademisë së Shkencave ku përfshihet dhe funksioni i Kryetarit”, sqarohet në dokumentin e Presidentit.